Donald Trump e ka organizuar me shumë kujdes vizitën e presidentit kinez në Shtëpinë e Bardhë, e para prej më shumë se një dekade, e cila filloi gjatë natës me mbërritjen e Xi Jinping në Uashington dhe do të përfundojë të premten. Presidenti shkoi për të pritur personalisht liderin kinez në momentin e mbërritjes së avionit të tij, në orën 18:00 (mesnatë në Shqipëri), në Bazën e Përbashkët Andreës, pak jashtë Uashingtonit. Është hera e parë që nga viti 1962 që një president i SHBA-ve pret personalisht një lider të huaj në momentin e uljes së avionit (me përjashtim të Papës), që nga koha kur Kennedy priti kryeministrin britanik McMillan.

E enjtja është moment kulminant: Donald dhe Melania do të presin Xi dhe bashkëshorten e tij, Peng Liyuan, për një ceremoni në Shtëpinë e Bardhë. Dy liderët do të inspektojnë trupat në Kopshtin e Trëndafilave (nuk do të mungojë as fluturimi mbi ta i bombarduesve B-2 dhe avionëve luftarakë F-22 Raptor), përpara se të zhvillojnë një bisedë me dyer të mbyllura. Ndërkohë, dy bashkëshortet do të shkojnë në muzeun Smithsonian për të eksploruar artin aziatik dhe ndërthurjet kulturore kino-amerikane.

Darka shtetërore është parashikuar për sonte: Trump e ka përshkruar atë si një event ku të gjithë do të donin të merrnin pjesë dhe ka shprehur që ende nuk e ka sallën e ballove të ndërtuar dhe gati për të pritur 1.000 persona. Të dy liderët do të mbajnë nga një fjalim.

Mes të ftuarve do të jenë themeluesi i Amazon, Jeff Bezos, Elon Musk, Sundar Pichai nga Google dhe Michael Dell, administrator i deleguar i Dell Technologies, Jensen Huang nga Nvidia, Sam Altman nga OpenAI, administratorja e deleguar e Citigroup, Jane Fraser, si dhe ish-administratori i Apple, Tim Cook. Shumë prej tyre e shoqëruan Trumpin në Kinë në muajin maj.

Nesër, Xi dhe Peng Liyuan do të kthehen në Shtëpinë e Bardhë për një çaj dhe, përpara se të largohen nga Uashingtoni, do të bëjnë një vizitë në Arkivat Kombëtare, ku ruhen disa prej dokumenteve më të rëndësishme mbi themelimin e Shteteve të Bashkuara, 250-vjetori i të cilit festohet këtë vit.

Wall Street Journal shkruan se në të kaluarën, përpara këtyre vizitave, vihej shumë theks te rezultatet konkrete që mund të arriheshin, ndërsa sot Trump, ashtu si Xi, i kushton shumë rëndësi imazhit dhe spektaklit. Megjithatë, mes republikanëve në Kongres ka njëfarë shqetësimi dhe frikë se Trumpi mund të bëjë lëshime lidhur me shitjen e armëve Tajvanit.

Ndër temat që janë në tryezë janë tarifat doganore, inteligjenca artificiale dhe mineralet e rralla. Pritet që Amerika dhe Kina të lehtësojnë disa tarifa për produkte jo-strategjike, por Shtetet e Bashkuara nuk janë të gatshme të zbusin kufizimet për eksportin e teknologjive të ndjeshme, megjithëse i kërkojnë Pekinit të mbajë një fluks të pranueshëm mineralesh kritike në tregun global.

Sa i përket inteligjencës artificiale, sekretari i Thesarit, Scott Bessent, u takua në New York me zëvendëskryeministrin kinez He Lifeng: ata diskutuan për një mekanizëm njoftimi reciprok, një lloj “vije të kuqe”, për të komunikuar çdo incident dhe rrezik për sigurinë kombëtare që lidhet me inteligjencën artificiale. Sipas faqes Semafor, Trumpi po mendon t’i japë Bessentit edhe rolin e “carit të inteligjencës artificiale” për të monitoruar këtë sektor.

Ndërkohë, sekretari amerikan i Thesarit, Scott Bessent, njoftoi se Uashingtoni dhe Pekini kanë rënë dakord për zgjatjen me dy muaj të armëpushimit tregtar, i cili skadonte më 10 nëntor. Pas bisedimeve të së dielës me zëvendëskryeministrin kinez He Lifeng, Bessent deklaroi se dy ekonomitë më të mëdha të botës kanë vendosur të zgjasin “uljen e tensioneve ekonomike mes dy vendeve”, e cila duhej të përfundonte më 10 nëntor. “Kjo periudhë do të zgjatet deri më 10 janar”, tha ai./Corriere